كان ياما كا يا سعد يا إكرام ما يحلى الكلام إلا بذكر النبي عليه الصلاة و
السلام
هحكيلكو حكاية من بتوع تيتة سونة جدتي
إن السيد والدي لما قابل الست والدتي انبهر بيها , أد ايه انسانة راقية , بنت هادية و مؤدبة و صوتها
وااااطي و ذوق
وما بتحتدش في النقاش معاه...
بتتكلم بلباقة و تدي اللي قدامها وضعه ...
وتنتهي الحكاية إني لازم أبقى كده بالظبط عشان أبهر الرجالة و أتجوز واحد
ابن ناس يعرف يعني ايه بنت ناس J
وكبرت و بعد سنين دراسة في نفس ذات الكلية دخلت و خرجت و زي الهبلة عملت
بنصيحة تيتة سونة و كنت واحدة بنت ناس
مبصاحبش عشان أنا بنت ناس
مبلبسش لبس مهشتك عشان أنا بنت ناس
و مبزعقش عشان بنت ناس
و باخد على دماغي و أسكت عشان أنا بنت ناس و عايزة واحد ابن ناس يكون بيقدر
يعني ايه بنت ناس
و لفيت كام سنة في جواز الصالونات زي أي بنت ناس
و قعدت قعدات ما يعلم بيها إلا ربنا , و محدش يرضاها لأي ناس
تخيلوا لما أنا _ كبنت ناس يعني_ يتقاللي كده بالنص : كنت هحترمك أكتر لو
حكيتي بصراحة عن تجاربك العاطفية في الجامعة بدل الكدب من أولها !!!!!!!!!
أنا يتقاللي كده !! ليه دانا بنت ناس !!
تخيلوا لما أنا _ كبنت ناس برضو_ يتأخر عليا واحد ساعتين ونص في النادي من
غير ما يعتذر , ساعتين و نص قاعدة أنا و أهلي مستنينه هو و أهله ... و لما طلبت
أمشي أمي قالت لي عيب الغايب حجته معاه يمكن حصل حاجة ... لازم نستنى و نشوف ما هو
ولاد الناس لازم ميبقوش متسرعين و يدوا العذر للناس
تخيلوا لما أنا _ مش هقول بنت ناس تاني خلاص انتوعرفتو بقى_ اتكونت عندي
عقدة إن كل اللي بيتقدموا لي ميبدفعوش الحساب في النادي و لا الكافيه اللي فيه
القعدات الأولانية !!! دايماً ماما هيا اللي بتحاسب مع إن العريس دايماً بيكون
الراجل الوحيد في القعدة لدرجة إني لما مرة واحد عزم إنه يدفع الحساب كنت هطير م الفرحة
و انبهررت غاية الانبهرار !!
تخيلوا لما أنا _ J_ يجيلي واحد عشان
مكسوفة أتكلم معاه لأول مرة يقوم يطلب ينهي اللقاء بعد 10 دقايق !!!! الواسطة
أنقذت الموقف و قعدت تفتح في مواضيع كتيييير عشان أفك و اتكلم براحتي و يشوفني على
طبيعتي , بس برضو , هو كوني بنت ناس و بتكسف يخليه عايز يمشي بعد عشر دقايق بس!!
للدرجة دي أنا منفرة كبنت ناس بتتكسف !!!
تخيلوا لما أنا يتقدم لي واحد يقوللي أنا قائد السفينة وانتي الواد بلية
اللي عايز يدلدل رجليه في الميه , و أكيد مش هرجع أنا كقائد في كل قرار للواد بلية
, فبالتالي الكلام ميبقاش فيه مناقشة , أنا شايف أحسن منك !!
تخيلوا لما أنا يتأخر عليا واحد في أول لقاء و يتأخر و يتأخر لحد ما والدته
تتحرج فتعتذر عن تأخيره تقول : معلش أصله مش عاوز يتجوز خالص , أنا اللي عاوزاه
يتجوز من دلوقتي للدنيا تاخده و ينسى نفسه !!
تخيلوا لما أنا يجيلي واحد بعد ما
أهله يحددوا أول معاد ميجيش و ييجوا لوحدهم من غيره و أقعد معاهم هما _ بس كانوا
لُطاف الصراحة_ !!
تخيلوا لما أنا واحد عايز يشوفني و ميرضاش يضرب المشوار و يجيلي , و أنا
اللي أسافر 85 كيلو عشان يقابلني لأول مرة في أرض محايده جنب بيته _ و يتعب نفسه ويسافر
ليه و مش أكيد إني هعجبه ؟ _ !!
تخيلوا لما أنا واحد مسافر بره يتقدم لي و أقوله عاوز تعرف عني إيه يرد
يقوللي حاجة واحدة : موافقة ع السفر ولا لأ !!
تخيلوا إن أنا يتقدم لي المطلق !!, و اللي مش عايز يقول هو مؤهله ايه !!, و
اللي بيقعد يخبط كلام كتير معقد عشان مفهمش شغلانته دي عبارة ايه بالظبط !!
الله يسامحك يا تيتة يللي خلتيني أعتقد إني لازم أبقى بنت ناس ...
و بنت الناس المفروض انها متتضايقش
أبدًا و لا تيأس أبداً و لا انها بعد كل اللي شافته تكره جواز الصالونات و اللي
بدعوه ...
بنت الناس المفروض انها تشوف كل ده و تصبر ... عشان لما يجيلها واحد ابن
ناس تقدره و تعرف قيمته...
و تحية كبييييييييييييييييييرة أوي لكل بنات الناس J
ليست هناك تعليقات:
إرسال تعليق