بعد أن فقدت طنط حشرية الأمل في
محسوبتكم
ظهرت طنطات تانيات أمسكوا الراية بحرص و كأن تجربة طنط حشرية قد أثمرت أنهم
بقوا أكثر حرصاً في التعامل معتقدات أنني معقدة و متطلبة
حددت خليفة طنط حشرية الميعاد في مكتبها في تمام السابعة مساءً
و أسعدتني الفكرة في حاجتين:
الأول : أن مكتب طنط قريب مننا و ممكن أتأخر و أحقق حلمي إني ألطعه شويه
الثاني : أن دمي مش هيتحرق لما سعادته ميحاسبش ع العصير اللي هنشربه لأننا
مش في النادي
وصلت بعد المعاد بربع ساعة و كلي أمل إنه يكون اتلطع
يااااااااااااااااااااااااااااااااااااااه
لكن تأتي الرياح بما لا تشتهي السفن , لقيته مجاش أصلاً L و بعد شوية
صغيرة وصلت مامته معتذرة عن تأخيره بحجة لطيفة جداً :
" أصله مش عاوز يتجوز معلش , أنا بحاول أحشر الفكرة
في دماغه للدنيا تاخده و ينسى نفسه "
بس يا برنس قُضِي أمرك ... طب والله مانا ماشية غير لما أغلّس عليك
فاكر لما تتأخر هتهرب من الليلة السودا اللي مستنياك !!! على
ميييييييييييييييييييين
كده كده والدتي العزيزة مش هترضى نمشي قبل ما حضرته يشرّف و نقعد معاه حبة
وديني لمنكدة عليك الليلة دي و محرماك مقابلات الصالونات دي تاني J
ساعة إلا ربع كاملة مرت , كل ما كان بيتأخر كل ما إبليس كان بيلهمني بأفكار
أعمق في التغتيت عليه
وصل الباشا متقمّع و متلمّع و ضحكته م الودن للودن
أكيد استغرب إننا لسه موجودين بس اللي جاي هيخليه يستغرب أكتر _
نيهاهاهاها_
بدأنا الكلام عن الشغل
شخص طموح , حِرِك , مخطط لمستقبله كويس و بيتحرك لهدفه بجدية و نشاط
عادي ولا يهز في راسي شعرة :P
بيصلي كل الفروض في الجامع
و إيه يعني المفروض ده يكون الطبيعي أصلأً
اصبر شوية يا ابليس يا عزيزي , أكيد هيرد على حاجة رد يتبستف عليه و ياخد
اللي فيه النصيب
_عملت إيه في الثورة صحيح ؟
الصدمة الأولى : نزل الميدان من أول يوم في الثورة
عاااااااااااااااااااااااا إبليس يتراجع ...
بس برضو كرامتي لسه واجعاني و لازم أقرفه
_و انتخبت مين في الجولة الأولى في الرئاسة؟
الصدمة التانية :أبو الفتوح عن
اقتناع شديد في الجولة الأولى ثم مرسي هرباً من شفيق في الجولة الثانية
و مازال بيحب أبو الفتوح جداً و شايف إنه الأفضل و إعجابه بيه كان ممتد من
زمان من ايام ما كان بيحاول محاولاته البائسة الإصلاح جوه الجماعة
عااااااااااااااااااااااا أبليس بيعيط , بس متخافش لسه في جولات تانية جاية
هقرفه فيها J هعرف أتلكك
له على أي حاجة و أخلّص منه عملته السودا
_ ايه رأيك في تأسيسة الدستور و اللي الاخوان عاملينه
فيها ؟
الصدمة الثالثة : متضايقش خااااالص من ذكر إبراهيم الهضيبي و لم تبدو عليه
أي علامات للغيرة أو الاستتفاه و لا اتحرق دمه و لا اتغاظ بالعكس أثنى عليه و على تحليلاته السياسية و
بيقتنع جداً بكلامه هو و د. رباب المهدي و
معجب بوعيه و شجاعته اللي خلوه يخرج من الاخوان رغم تاريخ عيلته فيها , فعلاً الحق
أحق أن يتبع
ممم ... لأ كله إلا إبراهيم الهضيبي ده كان دايماً خط الدفاع الأخير عندي ,
أطفشه و أستفزه بإيه ولا بمين دلوقتي , أحمد عز و لا توم كروز زي البنات السيس !!!
عزيزي إبليس أنت في مأزق L
لقيت نفسي نسيت نيتي اللي مش تمام , و عملت زي العيلة الصغيرة و بقيت بسأل
بدافع الفضول عن كل حاجة , البني آدم ده نجح في إثارة فضولي و ده شئ نادر الحدوث
_ هو انت زيي
بتحب الاخوانجية المنشقين ؟
الصدمة الرابعة : بيعشق أبو علا ماضي و مصطفى النجار و قاللي إنه هيدور على
كتابات أسامة درة لما حكيت له عليه , و عجبته أوي نظريةthe ideal man
is X Ikhwan " "
طب ده أغلس عليه من أنهي زاوية بس !!
*بتسمع مين من المشايخ ؟
ذكر بعض مشايخ السلفية و الصوفية بما لا ينبأ باتجاهه , لكن المهم إنه فاهم
يعني إيه مشايخ , مبيقولش على كام داعية بيشوفهم في التليفزيون و خلاص
"تعرف الشيخ حمزة يوسف ؟؟؟
شفت رحلاته في اسبانيا ؟؟؟
بتحب محمد بن أبي عامر ؟؟؟
عارف و أنا صغيرة كان نفسي أتجوز عبد الرحمن الناصر , ده
فتى أحلامي
أنا نفسي أزور قرطبة و قصورها و غرناطة و أبراج الحمراء
و اشبيلية و الأماكن دي كلها "
الشيء الغريب إنه كان متفاعل معايا جداً جداً جداً كما لم يعمل حد قبله
حتى صحابي بيسمعوا تخاريفي دي بيضحكوا عليها
لكن ده ... كان مختلف ...
بدا لي لوهلة إنه بيشاركني أحلامي الغريبة و إنه مبسوط بكلامي و حكاياتي و
كان بيكمّل على كلامي كمان و حكى لي عن يوسف بن تاشفين و كان زعلان لأن فيه مؤرخين
بيتهموه بالطمع في السلطة
ايه ده فين إبليس !!!! شكله مشي من بدري J
لقيت فيه توافق كبير بيننا و تشابه في وجهات النظر والاهتمامات و ده بيدل
إن الجوازة دي مش باين لها شمس , اللي زيه مش هيتجوز عشان ماما عاوزاه يتجوز
و برضو أنا كرامتي متسمحليش أتجوز واحد اتأخر عليا ساعة إلا ربع _ إلا لو
لحّ أوي يعني J _
خلاص وهو كذلك , أنا أعترف إني سعيدة بمقابلة شخص زيه و استمتع ببقية الوقت
اللي فاضل لنا و أروَح بيتنا أحمِد و أسترجع
و أنا ماشية كنت عايزة أطلب رقم تليفونه لأني فعلاً كنت هعتز جداً بصداقته
, لكن خفت يفهمني غلط
أنا نفسي يبقى واحد زيه صديق ليا ... حتى لو كنا اتقابلنا في جواز صالونات
إيه المانع يعني !!!
ممكن أحلف إني مش هدبِّسُه في جوازة J أنا مصدقت
لقيته , و مش عايزة أكتر من صداقته ...
فيها حاجة دي بقى !
